12 ကိုယ့်အကြိုက် (Tag )

---

ကျွန်တော့်ကို ကျွန်တော် စောင့်ကြည့်နေတာ ကြာပြီ။ ဒီကြားထဲမှာ ကိုဏီလင်းညို က “ ကိုယ့်အကြိုက် ” ဆိုပြီး Tag လိုက်တော့ ကျွန်တော့်မှာ တော်တော် ခက်သွားတယ်။ ဒီတော့မှ ကိုယ့်ကိုယ်ကိုယ် အပြန်အလှန် ပြန်ပြီး စစ်ကြည့်မိတယ်။ ငါ ဘာတွေ ကြိုက်သလဲ။ “ မသိဘူးလေ ” တဲ့ အထဲက ပြန်ပြောတယ် ကောင်းရော။

ဟာ . .ဒါဆို ငါ သူ့နေရာမှာ တုန်းက သူ့ရေးထားတာ ဖတ်ပြီး ဘယ်လို ခံစားရသလဲ ဆိုပြီး ပြန်စဉ်းစားတော့ သူ့နေရာမှာ သူ့စာဖတ်ပြီး ငါ ဒီလို ရေးထားတာပဲ ဆိုပြီး ပြန်သတိရတယ်။

1) အိပ်ယာခင်းနဲ့ မအိပ်တတ်... ခါးနာသောကြောင့် ၊ ထို့ကြောင့် ကုတင်ပေါ်မှာ သစ်သားပြားခင်းအိပ်... သို့သော် ... စပရင် ဆိုဖာ (မွေ့ယာ) ဆိုရင်တော့ အိပ်တတ်...

2) ပိုက်ဆံဆိုတာ ရှိထားသင့်....

3) စာအုပ်ကိုတော့ ပြောဖို့ မလို ၊ အရင်က တလ ၇ သောင်းကျော်ဖိုးလောက် ဝယ်လို့ အမြဲ အဆူခံရ...

4) ဒိုင်ယာရီ မရေးဖြစ်တော့ . . သို့သော် မှတ်ချက်ရေးထားသော စာအုပ်များစွာ...

5) သစ်ပင်စိုက်ထားတယ်... စက်ရုံထဲမှာတင်. . ဒီအတွက် ပို့စ်ရေးဦးမှာ..

6) ဂီတ ဆိုတာ လူ့စိတ်ကို နူးညံ့စေတယ်. . ဒါကြောင့်..ကြိုက်စ်...

7) ဂစ်တာကို ဗုံလိုသာတီးတတ်...

8) သံစဉ် ၊ ရုပ်ပုံ ၊ ဗီဒီယို အားလုံး ကွန်ပျူတာဖြင့်သာ ကြည့်ပါတယ်.. ဒါကြောင့် ဒါတွေ (တခြားစက်တွေ) မရှိ...

9) ဒါကြောင့် ကွန်ပျူတာက အိမ်မှာနဲ့ အပြင်သွား ၂ လုံးဖြစ်နေ...

10) RM 99 တန် နိုကီယာ ဖုန်းသာ ကိုင်လာတာ ၂ နှစ်ကျော်... ဒီဖုန်းတောင်မှ ပိုက်ဆံမထည့်လို့ ကဒ်က ခဏခဏ သေနေတယ်... ဟော ပြောရင်းတောင်မှ အခုလည်း သေနေ...

ဘဝမှာ အလိုချင်ဆုံးကတော့ အေးချမ်းသာယာသော မိသားစု ဘဝလေး တစ်ခုရယ်သာ... ။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

ဒီလို သွားရေးမိတာကို ပြန်သတိရမိတယ်။ ဒါနဲ့ ကိုယ့်ကိုယ်ကိုယ် ငါ ဘာကြိုက်လဲ လို့ တစ်ခါမှ မစဉ်းစားမိလေတော့ ဘယ်လိုမှ ဆက်မပြောတတ်တော့။ ဆက်မပြောတတ်ပေမဲ့ မပြောလို့ မရပေဘူး။ (မရေးရင်လည်း သူက ရှောက်သီးဆေးပြား မရောင်းပဲ စီဘောက်မှာ ခဏခဏ လာအော်သွားတယ်လေး။ သူ Tag ထားတာ မရေးသေးလို့တဲ့။) ဒီတော့ အခုမှ ကိုယ့်ဖာသာ ပြန်ပြီး စဉ်းစားကြည့်တယ် . . “ ငါ ဘာကြိုက်လဲ . . ငါ ဘာကြိုက်လဲ။ ” ဒီတော့ ကြိုက်တာတွေရော ၊ မကြိုက်တာတွေက ပလုံစီပဲ ထွက်လာတယ်။

ဒါပေမဲ့. . . ဒါတွေကို ကျွန်တော်က “ ကိုယ့်အကြိုက် ” ဆိုပြီး ကြိုက်တာတွေချည်း မရေးချင်ဘူးဗျာ။ ကျွန်တော် ဟိုဟာသလေးထဲကလို ရောပြီး ရေးချင်တယ်။

“ မိန်းမက အလုပ်က ပြန်လာတဲ့ ယောက်ျားကို တံခါးဝမှာ ကြိုပြီး မျက်နှာမကောင်းပဲ စောင့်နေတာ တွေ့တော့ ယောက်ျားလုပ်သူက အလုပ်က မောပြီး ပြန်လာတာ ဆိုတော့ မကောင်းတဲ့ သတင်းကို အရင် မကြားချင်ဘူး။ ဒါကြောင့်. . .

“ ငါ့ကို မကောင်းတဲ့ သတင်းတွေ အရင် မပြောနဲ့ကွာ။ ကောင်းတာတွေ အရင်ပြောစမ်းပါ။ ”

လို့ မိန်းမကို ဟန့်တယ်။ ဒီတော့ မိန်းမက ပျော်သွားပြီး ဒီလို ပြောလိုက်တယ်။

“ ရှင့်သား သုံးယောက်မှာ ဒီနေ့ နှစ်ယောက်က လက်မကျိုးဘူး။ ”

တဲ့လေ။ ”

ကျွန်တော်လည်း ဒီလိုပဲ ပြောပြချင်တယ်။ ကျွန်တော်ကြိုက်တာတွေချည်းပဲ ရေးမပြချင်ဘူး။ ရွေးစရာ နှစ်ခုပဲ ရှိတာတွေဆို မပေါ်လွင်တာလေးကို တင်ပြရတာကိုက ပိုပြီး စိတ်ဝင်စားစရာ ကောင်းတယ်လို့ ထင်တယ်။ ဥပမာ - ခေါင်းနဲ့ ပန်းမှာ ဘယ်ဟာ ကျနေလဲ ဆိုရင် ဘယ်သူမဆို အပေါ်က ဟာကိုပဲ ပြောတတ်တယ် မဟုတ်လား။ ဒီတော့ “ ပန်းက အောက်မှာကွာ ” ဆိုပြီး ပြောတာမျိုးလေးပေါ့။

ဒီလိုလေးပဲ စပြောကြည့်ရအောင်. . . .။

~ ~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~ ~

ပထမဦးဆုံး ကျွန်တော့်အကြိုက်က ကျွန်တော့်ကိုယ်ခန္ဓာက ချို့ယွင်းချက် မရှိ အားလုံး ကောင်းမွန်နေတာကိုပဲ။ ဒါ အရေးကြီးပါတယ်။ ကိုယ့်မှာ ရှိနေတာ ၊ ကောင်းနေတာကို လူတွေက မမြင်တတ်ကြဘူး ၊ သူများတော်နေတာ ၊ တတ်နေတာ ၊ ကောင်းနေတာ ကိုပဲ မြင်ပြီး အားကျကာ အားငယ်နေတတ်ကြတယ် မဟုတ်လား၊ ဒီအတွက် ကျွန်တော် “ ချို့ယွင်းချက် မရှိပဲ ကျန်းမာရေးကောင်းနေသော ခန္ဓာကိုယ်ကို ကြိုက်တယ်။ ”

ဒါကြောင့် ကျွန်တော် “ ကျန်းမာနေတာကို ” ကြိုက်တယ်။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

ကျွန်တော် ပိုက်ဆံကို မကိုးကွယ်ပါ။ သို့သော် ကျွန်တော် ပိုက်ဆံကို ကြိုက်နှစ်သက်တယ်။ ဘာလို့လည်း ဆိုတော့ ပိုက်ဆံ မရှိရင် ကျွန်တော်က မနေတတ်သူ တစ်ယောက် ဖြစ်တယ်။ လက်ထဲမှာ ပိုက်ဆံ မရှိရင် အလိုလို အားငယ်သလို ခံစားရတယ်။ သူများတွေ လက်ဖက်ရည် တစ်ခွက်ဖိုးနဲ့ လက်ဖက်ရည်ဆိုင် သွားတတ်ကြပေမဲ့ ကျွန်တော်က အိတ်ထဲ ( မြန်မာငွေ ) X X X X X အောက် လျော့နေရင် ကျွန်တော် မနေတတ်။ ကိုယ့်ကိုယ်ကိုယ် ယုံကြည်မှု အားနည်းတာ မဟုတ်ပေမဲ့ ငွေမပါပဲ လိုချင်တာ တစ်ခုခု ပေါ်လာလို့ မဝယ်လိုက်နိုင်ပဲ လွဲသွားမှာ စိုးတာက အဓိက ဖြစ်တယ်။

ပိုက်ဆံ ဆိုတာ လိုတာတွေ အားလုံးကို မဖြစ်စေနိုင်ပေမဲ့ အရာများစွာကိုတော့ စိတ်ကျေနပ်အောင် ဖန်တီးပေးနိုင်တယ်။

ဒါကြောင့် ကျွန်တော် သမာသမတ်ကျစွာ  ရလာသော “ ပိုက်ဆံ ” ကို ကြိုက်တယ်။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

လိုချင်တာ တစ်ခုခုကို မဝယ်လိုက်နိုင်မှာ စိုးလို့ ဆိုလို့ ကျွန်တော်က ပစ္စည်းတစ်ခုခုကို လွယ်လွယ်နဲ့ ဝယ်တတ်တယ် ထင်နေဦးမယ်။ မဟုတ်ပါ။ ကျွန်တော်က အလွန် ပစ္စည်း ချေးများသောသူ တစ်ယောက် ဖြစ်တယ်။ အဝတ်အစားဝယ်ရင် ကျွန်တော်က ဟိုဟာ ကြည့်လိုက် ဒီဟာ ကြည့်လိုက်နဲ့ တော်တော်ကို အဆင်မပြေ။ ဒီဇိုင်း ၊ အရောင်ကြည့်ပြီးတော့လည်း ၊ ချုပ်ရိုးချုပ်သား ၊ ဒါကို အဆင်ပြေတော့လည်း ကိုယ်နဲ့ Fit ဖြစ်ရဲ့လား။ ဒီလို ကြည့်တာနဲ့ တော်တော်နဲ့ မဝယ်ဖြစ်ဘူး။

ငယ်ငယ်ကဆို မေမေတို့က ကျွန်တော့်အတွက် ဝယ်လာပေးတာတွေကို တမင်လုပ်ငြင်းတာ မဟုတ်ပေမဲ့ ဟိုနားက မကြိုက် ၊ ဒီနားက ဘာဖြစ် ဆိုတာနဲ့တင် နောက်တော့ မဝယ်ပေးတော့ဘူး။ တစ်ခါတစ်လေ ဈေးသွားရင်း ကြုံလို့ “ သား ဒါလေး ဝယ်ပါလား ” ဆိုပြီး ဝယ်ပေးရင်တောင်မှ ချေးများနေတာနဲ့ နောက်ဆုံး ဝယ်ပေးသူ ဒေါသဖြစ်ပြီး မဝယ်ဖြစ်တော့ဘူး။

ဒါကြောင့် “ အဝတ်အစားနဲ့ အသုံးအဆောင် ” တွေကို ကျွန်တော် မကြိုက်။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

တခြားတခြားသော အရာများ နည်းတူပဲ ကျွန်တော် ဘယ်အရာကိုမှ သိပ်ပြီး စွဲစွဲလန်းလန်း ကြိုက်မိတတ်သည် မဟုတ်။ ဒါပေမဲ့ ကျွန်တော့်ဘဝမှာ ဟိုးအရင်ကရော အခုရော ၊ အခုရော ၊ နောင်ရော ၊ တစ်သက်လုံးရော ကြိုက်သွားမှာ တစ်ခုတော့ ရှိပါတယ်။ သူက သက်မဲ့ ပစ္စည်းပဲ ဖြစ်တယ်။ ဒါက စာအုပ်တွေပါ။

ကျွန်တော့်ဘဝရဲ့ အချိန်တော်တော်များများက စာအုပ် ( သို့ ) စာတွေ ဖတ်နေရတာနဲ့ ကုန်လွန်နေလေ့ ရှိတယ်။ စာပေဆိုတာ လူတွေ ၊ သတ္တဝါတွေ အားလုံးရဲ့ သမိုင်းလို့လည်း ပြောလို့ ရတယ်။ လူတစ်ယောက် မှားတာကို ကိုယ်က ကိုယ်တိုင် မှားစရာ မလိုပဲ ပညာလိုချင်ရင် လုပ်ရမဲ့ အလုပ်က သူမှားခဲ့တာကို ရေးထားတဲ့ စာလေးကို ဖတ်ပြီး ကိုယ်က သူမှားခဲ့သလို လိုက်မမှားအောင် ပြင်ဆင်လိုက်နိုင်ရင် ကိုယ်က ပညာရလိုက်တာပါပဲ။

အင်တာနက် ဆိုတာရယ် ၊ အီးဘုတ် ဆိုတာရယ်နဲ့ အကျွမ်းမဝင်ခင် အချိန်မှာ ကျွန်တော် စာအုပ်တွေနဲ့ ဝန်းရံနေတဲ့ နေရာ တဝိုက်မှာသာ နေထိုင် အိပ်စက်ဖြစ်ခဲ့တယ်။ အခုတော့ အင်တာနက် ၊ အီးဘုတ် ၊ ဘလော့ ဆိုတော့ ကျွန်တော်မှာ လူတွေရဲ့ အမြင်တွေ ၊ အကြားတွေ ၊ အသိတွေကို ဗဟုသုတ အနေနဲ့ ကြားရ ဖတ်ရတယ်။

ဒါကြောင့် “ Blog တွေ ” ကိုလည်း ကြိုက်ပါတယ်။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

ဒါပေမဲ့ တချို့ Blog တွေမှာ Blogger တွေရေးတာကို ကျွန်တော် မကြိုက်ပြန်ဘူး။ သူတို့ရဲ့ စာအရေးအသားကို မကြိုက်တာ မဟုတ်ပေမဲ့ သူတို့ တင်ပြပုံနဲ့ ဖော်ညွှန်းချက်တွေကို မကြိုက်ဘူး။ မြန်မာတွေမှာ ခက်နေတာ သူတစ်လူ ၊ ငါ တစ်မင်း ဖြစ်နေတာပဲ။ ဥပမာ အနေနဲ့ ကြည့်ဦး။ ဂျာနယ်တွေမှာ ရေးကြတယ်။ Real Madrid အသင်းကို ဂျာနယ်ပေါင်းများစွာက “ ရီးရဲ မက်ဒရစ် ” “ ယီးယဲ မက်ဒရစ် ” “ ရီးယဲ မက်ဒရစ် ” တဲ့လေ။ နောက်တော့ လီဗာပူးက Dirk Kuyt ကို ဂျာနယ် တွေမှာ ရေးကြတယ် “ ဒါကုတ် ” “ ကူရစ် ” “ ဒါကောက် ” တဲ့။ တကယ်ဆို သူတို့နိုင်ငံရဲ့ သူတို့ ဘာသာစကားနဲ့ အခေါ်အဝေါ်လေးကို လိုက်နားထောင်ပြီး ရေးလိုက်ပေါ့။

အခုတော့ဗျာ။ မြန်မာတွေမှာ တစ်ကျောင်းတစ်ဂါထာ တစ်ရွာ တစ်ပုဒ်ဆန်း ဆိုသလို ဖြစ်နေတယ်။ အခု ကျွန်တော် မြတ်နိုးနေတဲ့ “ Blog ” ဆိုတာကို ရေးလိုက်ကြတာ တစ်ယောက် တစ်ပေါက် ၊ “ ဘလောက် ” “ ဘလော့ဂ် ” “ ဘလော့ ” “ ဘလုဂ် ” တဲ့။ Comment ဆိုရင်လည်း “ ကွန်မန့် ” “ ကွန်းမန့် ” “ ကော်မန့် ” တဲ့။ ဒါတွေကို ကျွန်တော် မြင်ရင် စိတ်မချမ်းသာဘူး။ ဘာမှ မဟုတ်ပါဘူး ဆိုတဲ့ ဒီလို စာလုံးလေး တစ်လုံးတောင်မှ ငါ ထင် ရေးချင်ရာ ရေးဖြစ်နေကြရင် တခြား  ကိစ္စတွေအတွက် ဘယ်လိုများ သွေးစည်းညီညွှတ် လိမ့်မလဲလို့လည်း တွေးမိတယ်။

ဒါတွေကို ကျွန်တော် မကြိုက်ပါ။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

Blog ပေါင်းများစွာ လိုက်ဖတ်တော့ ကျွန်တော် ငယ်ငယ်က အဘွားနှစ်ယောက်ရဲ့ ပုံပြင်စာအုပ်လေးတွေ ဖတ်ပြတာကို သွားသတိရတယ်။ ကျွန်တော့်ငယ်ငယ်က အဖွားနဲ့ အတူတူ အိပ်ရတယ်။ အိပ်ယာဝင်ခါနီးရင် အဖွားက ပုံပြင်တွေ ပြောပြတယ်။ ငါးရာ့ငါးဆယ် ဇာတ်တော်တွေရောပေါ့။ အဖွားလိုပဲ ကျွန်တော့်ကို ပုံပြင်တွေ ၊ ပုံပြင် စာအုပ်တွေ ဖတ်ပြသူက အဖွားအစ်မ ၊ ကျွန်တော်က “ ဖွားလေး ” လို့ ခေါ်တယ်။ ဖွားလေး ပုံပြင်ပြောပြရင် အရမ်းနားထောင်ကောင်းတယ်။ ကျွန်တော့်အဖွား ပုံပြင်ပြောပြရင်တော့ အဓိပ္ပါယ်ကို သိလိုက်တယ် ဆိုတာပဲ ရှိတယ်။ နားထောင်လို့ သိပ်မကောင်း။

ဒီတော့ သူတို့ ဘယ်လိုများ ပုံပြင် ပြောပြပါသလဲ။ ဖွားလေးက ပုံပြင်ပြောပြမယ် ဆိုရင် ပုံပြင်နဲ့ ပတ်သတ်တဲ့ ဗဟုသုတတွေကိုပါ အရင်ပြောထားတယ်။ ဒီတော့ ပုံပြင်ကို နားမထောင်ရသေးကတည်းက ပတ်ဝန်းကျင်ကို မျက်လုံးထဲမှာ မြင်ယောင်မိစေတယ်။ နောက်တော့ သူပုံပြင်ပြောပြတယ် ဆိုရင်လည်း မျက်လုံးကြီး အသေ ၊ မျက်နှာအတည် ၊ ခန္ဓာကိုယ် အငြိမ် နဲ့ ပြောတတ်တာ မဟုတ်ပါ။ သူ့မျက်နှာမှာကို ပုံပြင်ရဲ့ ခံစားချက်တွေ ထင်ဟပ်ပြီး ပြောပြတယ်။

ဒီတော့ နားထောင်နေရတဲ့ ကျွန်တော်တို့ကလည်း ဟာခနဲ ၊ ဟင်ခနဲ ပါပဲ။ ဥပမာ သူဖတ်ပြနေတဲ့ ပုံပြင် ရုပ်ပြစာအုပ်လေး ဆိုရင် မင်းသမီးလေးက ငိုတယ် ဆိုပါတော့ သူက ဇာတ်ကြောင်းကို ပြောပြရင်း “ ဒီမှာကြည့် ပုံလေးကို မင်းသမီးလေး မျက်ရည်တွေ ကျနေတယ် တွေ့လား။ ” အဲဒီလိုမျိုး ဇာတ်ကြောင်းထဲပါ ဆွဲခေါ်ပြီး မျောပါသွားအောင် ပြောတတ်သူပါ။ ဒီတော့ ကျွန်တော်တို့လည်း ပါးစပ် အဟောင်းသားနဲ့ပေါ့လေ။

ကျွန်တော့် အဖွား ပုံပြင်ပြောရင်တော့ ဒါက ဒါ. . .၊ ဟိုဟာက ဟိုဟာ. . ၊ ဒါကြောင့် ဒါဖြစ်တယ် ဟိုဟာ မဖြစ်ဘူး ဒါပဲ။ အဲ. . သလိုကြီး။ ကျွန်တော်တို့ စိတ်ထဲ မျက်လုံးထဲမှာ ပုံပေါ်တယ် ဆိုရုံပဲ ရှိတယ်။ တစ်ခါတစ်လေ လာလိုက်သေးတယ်။ “ ဒါပဲ ဆက်စဉ်းစားကြတော့ ” တဲ့။ ပုံပြင်ထဲကို ကျွန်တော်တို့ကို ခေါ်သွားပြီး အထဲမှာ ယောင်လည်လည် ထားခဲ့သလိုပါပဲ။ ဒီတော့ ကျွန်တော်တို့ ဆက်ပြီး ပုံပြင်လေးကို ဘယ်လို ဖြစ်သင့်လဲ ဆိုပြီး ဆက်စဉ်းစားကြရပါတော့တယ်။ ဒါပေမဲ့ ကြီးလာတော့ ဒါက ပိုကောင်းလာခဲ့တယ်။

အခုတော့ ကျွန်တော် လိုက်ဖတ်နေတဲ့ Blog တွေမှာ ဒီလိုနည်း နှစ်မျိုးနဲ့ ရေးထားတဲ့ “ Blogger ” များရဲ့ စာများကို ကျွန်တော် ဖတ်ခွင့်ရခဲ့တယ်။

ကျွန်တော် ဘယ်ဟာကို ပိုကြိုက်မယ် ထင်ပါသလဲ။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

ကျွန်တော် မြန်မာ့ ရုပ်ရှင် သမိုင်း တလျှောက်မှာ အကြိုက်ဆုံး “ ဒါရိုက်တာ ” ကို ပြောပါ ဆိုရင် . . . ကျွန်တော် အကြိုက်ဆုံး ဒါရိုက်တာက “ အကယ်ဒမီ မောင်ဝဏ္ဏ ” ပါပဲ။ ကျွန်တော် ဘာလို့ ကြိုက်တာလဲ ဆိုတော့ အကြောင်းရှိပါတယ်။

ဆရာ မောင်ဝဏ္ဏက ပြောပါတယ်။ အခုခေတ်လူတွေကတဲ့ ဟိုးအရင်က လူတွေထက် နားလည်သဘောပေါက် လက်ခံနိုင်စွမ်း ပိုပြီးတော့ ကောင်းမွန် ထက်မြက်လာပြီ တဲ့။။ ဒါကြောင့် မင်းသား ရန်ကုန်ကနေ မန္တလေးသွားတာကို ဘူတာရုံထဲကို မင်းသား ကားစီးလာရာကနေ မင်းသား ဘူတာထဲ ဝင်တာ ၊ ရထားပေါ်တတ်တာ ၊ ရထားဥသြဆွဲတာ ၊ ဘီးစလှိမ့်တာ ၊ ရထားကြီး ဝေးသွားတာ ဒါတွေကို အကုန်လုံး ရိုက်ပြနေစရာ မလိုတော့ဘူး။

သူတို့ကို မင်းသား မန္တလေးသွားမယ် ဆိုတာကို စကားနဲ့ ရိုက်ပြထား ၊ ပြီးရင် သွားတော့မယ်လို့ တစ်ယောက်ယောက်ကို နှုတ်ဆက်ပြ ၊ ရထားဘူတာ ရုံကို ပြ ၊ ရထားထွက်သွားတာကို ပြ ၊ မန္တလေးဘူတာကိုပြ ၊ ရထား ဝင်လာတာကို ပြ ဒါဆိုရင် လုံလောက်ပြီတဲ့။

ဒါကို ကျွန်တော် အရမ်းကို ကြိုက်နှစ်သက်တယ်ဗျာ။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

ဘာလို့လဲ ဆိုတော့ ကျွန်တော် ငယ်ငယ်က စာပေအရူးအမူး ဝါသနာပါတဲ့ သူငယ်ချင်း ၅ ယောက်နဲ့ ဝတ္ထုစာအုပ်လေး တစ်အုပ်ကို ဖတ်ပြီး အဲဒီအထဲက ကိုယ်ကြိုက်တဲ့ ဇာတ်ကောင် တစ်ခုကို ဆွဲထုတ်ပြခိုင်းတော့ ၅ ယောက် မို့လို့သာပေါ့ဗျာ။ တစ်ယောက်မှ မတူကြဘူး။ ဘယ်လောက်များ လွဲသလဲ ဆိုရင် အထဲမှာ ပါတာက အဓိက ဇာတ်ကောင် ၄ ယောက်ထဲပါ။

ဇာတ်လမ်းကို ဖတ်ပြီး ဝေဖန်နေတာ ၅ ယောက် မဟုတ်လား။ ဒါကြောင့် အနည်းဆုံး နှစ်ယောက်ကတော့ သွားပြီး တူနေရမယ်လို့ အကြမ်းအားဖြင့် မြင်နိုင်တယ်။ ဒါပေမဲ့ တကယ်ကိုပါ တယောက်မှ မတူပဲ ဇာတ်လမ်းကို ဖတ်ပြီး သူတို့ ထင်မြင်ခံစားမိတဲ့ ဇာတ်ရုပ်တွေကို ဆွဲထုတ်လိုက်တာ ၅ ယောက် ဖြစ်သွားတယ်။ အဓိက ဇာတ်ကောင် ၄ ယောက်ထဲပါတာမှာ နောက်ထပ် တစ်ယောက်က ဘယ်က ရောက်လာတာလဲ ဆိုတော့ စာရေးသူ ဆိုတာ သူရဲ့ စာထဲကို နှစ်ဝင်ပြီး ရေးတတ်တယ် မလား။ ဒီအထဲမှာ စာရေးသူရဲ့ စိတ်တွေကို သွားပြီးတော့ မြင်နေရတော့ တာပါပဲ။

အဲဒီလို မြှုပ်နေတဲ့ ၅ ယောက်မြောက်ကို ဖော်ထုတ်ပြီး ကျွန်တော်တို့ နောက်ကျတော့ သူငယ်ချင်းတွေ အချင်းချင်း အပျော် အနေနဲ့ “ ခေါင်းစဉ် ” လေး တစ်ခုကို ရွေးပြီး ကဗျာ ၊ ဝတ္ထု အပြိုင်ရေးခဲ့ကြတယ်။ ကိုယ်ပိုင် အမြင်လေးတွေပေါ့။ ဒါကို အခုခေတ် Blog မှာတော့ “ Tag ” တယ် လို့ ခေါ်မယ် ထင်တယ်။ ဒါပေမဲ့ဗျာ . .မသိသား ဆိုးဝါးလှစွာပဲ အခုတော့ ဟိုလူက ဒီခေါင်းစဉ်နဲ့ Tag တယ်။ ရေးချင်သလို ရေးပါ လို့ ပြောလိုက်တယ်။

ဒါက ကိုယ်ဖန်တီးမဲ့ စာမူကို မိမိ ခံစားမိသလို ရေးပါလို့ ပြောတာပါ။ အခုတော့ဗျာ. . .“ ခေါင်းစဉ်လေး တစ်ခု ” အပေါ်မှာ လူတွေများစွာ ရဲ့ မတူညီတဲ့ အမြင်လေး ရချင်လို့ Tag ဆိုပြီး ရေးပါတယ်။ ခေါင်းစဉ်ကိုပါ ပြောင်းပြီး ရေးတော့တာပဲ။ တကယ်တမ်း အမှန်ဆို ခေါင်းစဉ်ကို တည်ကြက်ယူပြီး အကြောင်းအရာ ၊ အမြင်တွေ ပြောင်းပြီး တင်ပြတာ မဟုတ်လား။ ဒါပေမဲ့ ကျွန်တော်တို့ Blogger ရပ်ဝန်းမှာ “ ပေါင်ချိန် ” လည်း မရှိပါ။ ဒါကြောင့် ဘယ်သူ့ဆီမှ လည်း သွားပြီး ဆုံးဖြတ်ခိုင်းလို့ မရပါ။

ဒီလိုတွေ ဖြစ်နေတာကို ကျွန်တော် “ မကြိုက်ပါ။ ”

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

နောက်ဆုံး တစ်ခုက . . . ကျွန်တော် ရင်ထဲမှာ တစ်ခါတစ်လေ ဆို့သွားစေတဲ့ စာလေးတွေကို ဖတ်ခွင့်ရတယ်။ ကောင်းလိုက်တာဆိုပြီး ကိုယ့်ဖာသာ အမြင်လေးနဲ့ အောက်မှာ Comment ပေးမယ် ကြံတော့ ထိုစာရေးသူက သူရေးတဲ့ စာကို သူ့လိုပဲ မြင်စေချင်တယ် ထင်ပါတယ်။ အောက်နေ အဆုံးသတ် မှတ်ချက် ( Conclusion (or) Writer Suggest Remark) အနေနဲ့ ရေးထားတာတွေ ဖတ်လိုက်ရတယ်။

အထက်ပါ အကြောင်းအရာက ဘယ်သို့ ဘယ်ပုံ ဖြစ်ပါတယ်။ ဒါကြောင့် ကျွန်ုပ်တို့လည်း ဒီလို ထင်မြင် ခံစားကြပါစို့လား. . . . ဘာညာပေါ့ဗျာ။ အဲဒီမှာတင် အထက်က မူရင်း ဘာသာပြန် ၊ ဖန်တီးရေးသားမှု ကြောင့် ရင်ထဲ ဆို့နင့်ပြီး ဖီးလ်တွေ တတ်နေတဲ့ ကျွန်တော် ထောပတ်နဲ့ မုန့်စိမ်းပေါင်း ရောစားလိုက်သလို အီလည်လည် ဖြစ်တော့တာပါပဲဗျာ။ ခုနက ဖီးလ်တတ်နေပြီး ပေးမယ် ဆိုတဲ့ Comment လေးတောင်မှ ဘယ်ရောက်သွားမှန်း မသိတော့ဘူး။

ဒါ ကျွန်တော့် အဘွား နှစ်ယောက် ပုံပြင် ပြောပြသလိုပါပဲ။ ဖွားလေး ပြောသလိုမျိုး ကလေးငယ်လေးတွေကို ပြောလို့ သင့်တော်ပါတယ်။ အသက်အရွယ် ၊ စဉ်းစားဥာဏ် ဖွံ့ဖြိုးလာတဲ့ သူတွေကိုတော့ ဒီလိုမျိုး လိုက်ပြီး ထင်မြင်ချက်တွေ နိဂုံးချုပ် ချပြပေးနေစရာ မလိုတော့ဘူးလို့ ထင်တယ်။ ကိုယ့်ရဲ့ စာထဲမှာပဲ ကိုယ်ပြောချင် ၊ တင်ပြချင်တာကို အစွမ်းကုန် တင်ပြပြီးရင် လိုရင်း ရောက်ပါပြီ။ ကျွန်တော့်အဖွားလိုမျိုး သူတို့ကို သူတို့ကို ပုံပြင်ထဲမှာ ပစ်ထားလိုက်စမ်းပါ။ သူတို့ဖာသာ ထွက်ပေါက်ကို တွေးတော ယူပါလိမ့်မယ်။

ဆရာမောင်ဝဏ္ဏ ပြောသလိုမျိုး ဒီခေတ်က လူတွေကို အရာရာ လိုက်ပြီး ရှင်းပြ နေစရာ မလိုတော့ပါဘူး။ သူတို့ဖာသာ နားလည်နိုင်မှု ( Understanding Level ) တွေ မြင့်မားကြပါတယ်။ ဒါကို ကိုယ်က သွားပြီး ဝါးဝါးကျွေးနေတော့ ငယ်တုန်းကတော့ ဟုတ်တာပေါ့ဗျာ။ ကြီးတော့မှ ဝါးကျွေးတာကြီးကို ဘယ်သူက စားချင်မလဲ. . ဖွယ်တယ်တယ် နဲ့ရယ်။ သူတို့ဖာသာလည်း ဝါးကြပါစေ ၊ ဝါးလည်း ဝါးစေချင်တယ်။

ဒီလိုတွေ ရေးထားတာကို ကျွန်တော် မကြိုက်ပါ။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~

သြော်. . . .

ကျွန်တော့်မှာလည်း “ ကိုယ့်အကြိုက် ” ဆိုတဲ့ ခေါင်းစဉ်နဲ့ ရေးလိုက်တာ . . ကိုယ် မကြိုက်တာတွေ တော်တော် ရောက်သွားပါလား။ တကယ်တော့လည်း ကျန်းမာရေးကလည်း အရေးကြီးပါတယ်။ အဝတ်အစား ၊ အသုံးအဆောင်များ ကလည်း အရေးကြီးပါတယ်။ ဘဝမှာ မိတ်ဆွေတွေ ဆိုတာကလည်း အရေးကြီးပါတယ်။ ဘဝမှာ ဗဟုသုတဆိုတာတွေကလည်း အရေးကြီးပါတယ်။ ဒါပေမဲ့. . . ဒီလို. . . ဒီလိုတွေ ကြားထဲမှာ တကယ်တမ်း အရေးအကြီးဆုံးနဲ့ ကျွန်တော် အကြိုက်ဆုံးကတော့ တစ်ခုပဲ ရှိပါတယ်။

သူသာ မရှိရင် ကျန်းမာရေးကောင်းသူလည်း ချုံးချုံးကျ သွားပါလိမ့်မယ်။ အဝတ်အစား မက်သူလည်း အဝတ်အစားတွေလည်း မကပ်နိုင် ဖြစ်ပါလိမ့်မယ်။ အသုံးအဆောင် ပစ္စည်းတွေလည်း အလကားဖြစ်ပါလိမ့်မယ်။ မိတ်ဆွေတွေကြားထဲမှာလည်း အခင်အမင်ပျက်ရပါလိမ့်မယ်။ ဗဟုသုတကြွယ်ဝသူတွေလည်း သွက်သွက်ခါအောင် ရူးသွပ်သွားပါလိမ့်မယ်။ ထိပ်တန်းဆိုတဲ့ လူတစ်ယောက်ကိုလည်း နေ့ချင်းညချင်း ဟိုးအောက်ဆုံးကို ရောက်အောင် ဆွဲချသွားပါလိမ့်မယ်။

သူက ဒီလိုကို အစွမ်းထက်ပါတယ်။ ဒါကြောင့် သူ့ကို ကျွန်တော် အရမ်းကို နှစ်သက်စွာ ကြိုက်မိပါတယ်။

ဒါကတော့ . . .“ အတင်းအကြပ် လုပ်ယူထားခြင်း ၊ အားနာလိုက်လျောမှုကင်းခြင်း ၊ အလိုလို သူ့ဖာသာ ပေါက်ဖွားလာခြင်း ” နဲ့ ပြည့်စုံတဲ့ . . . .

“ မေတ္တာတရား ” . . . . . . . . . ပါပဲ။

ကျွန်တော့်ဘဝမှာ ချစ်ခြင်းမေတ္တာတရားနဲ့ ပြည့်စုံသော မိသားစုလေး တစ်ခုကို ကျွန်တော် အလိုချင်ဆုံးပါပဲ။

သူ့ကိုတော့ ကျွန်တော် အလွန် ကြိုက်ပါတယ်။

မှတ်ချက်။  ။ ကျွန်တော် အခုချိန်အထိ ကျွန်တော် စပြီး ဘယ်သူ့ကိုမှ မ Tag ရသေးပါ။ သူများတွေ Tag လာတာကိုသာ ထပ်ဆင့် Tag လိုက်တာပါ။ ဒါကြောင့် ဒီပို့စ်မှာတော့ မ Tag တော့ပါဘူး။ ကျွန်တော်လည်း နောက်ထပ် ပို့စ် တစ်ခုလောက် အားလုံးကို Tag ပါရစေ။

ကိုဇော် ခံစားတင်ပြသည်။

15.4.2010 – 7.51 AM

.

ကိုယ့်အကြိုက် (Tag )