3 နည်းနည်းတွေးပြီး စဉ်းစားပေးပါ..(၂)

အခု တလော Fwd Mail ထဲမှာ မေးလ်လေး တစ်စောင်က တော်တော် ပျံပြီး ပို့နေကြတယ်။ ကျွန်တော့်ဆီကို အကြိမ်ကြိမ် ရောက်လာခဲ့တယ်။ မူရင်း ရေးသူကို ကျွန်တော် မသိပါ။ သို့သော်. . .  ကျွန်တော် စဉ်းစားမိတာလေး တင်ပြချင်ပါတယ်။ မူရင်း စာလေးက ဒီလို ဆိုပါတယ်။

ဒီပုံပြင်က ဂျပန်မှာ တစ်ကယ်ဖြစ်ပွားခဲ့တယ်လို့ ဖတ်ရပါတယ်။ တစ်ခါက လူတစ်ဦးသည် အိမ်ပြင်ရန်အတွက် အိမ်နံရံများကို ဖျက်ချခဲ့သည်။ ဂျပန်စတိုင်လ် အိမ်နံရံများသည် အလယ်တွင် ပျဉ်အရင်ခံပြီး ဘေးနှစ်ဖက်ကို အုတ်ဖြင့် ပြန်စီထားခြင်းဖြစ်သည်။ ထိုကြောင့် နံရံ အလယ်မှာ အခေါင်းပေါက်ဖြစ်နေသည်။ သူသည် နံရံကို ဖျက်ချစဉ် နံရံအတွင်းတွင် အိမ်မြှောင်တစ်ကောင်အား တွေ့မိသည်။ အိမ်မြှောင်၏ အမြီးသည် သံချောင်း တစ်ချောင်းနှင့် ရိုက်မိနေသည်ကို ထူးဆန်းစွာ တွေ့မိသည်။
               
မလှုပ်သာ မခံသာ သနားစရာ အိမ်မြှောင်အား ရိုက်မိနေသော သံချောင်းကို သူသေချာ ကြည့်လိုက်မိသည်။ ထို သံချောင်းမှာ လွန်ခဲ့သော (၁၀)နှစ် အိမ်ဆောက်စဉ်က ရိုက်ခဲ့သော သံဖြစ်ကြောင်း သူအံသြစွာ တွေ့လိုက်သည်။ (၁၀)နှစ်အတွင်း အိမ်မြှောင်ဘယ်လို အသက်ရှင်ခဲ့သလဲ... မှောင်မဲနေတဲ့ နံရံအတွင်း မသွားနိုင် မလှုပ်နိုင်ဘဲ အသက်ရှင်ဖို့က သိပ်မလွယ်ကူလှပေ။ အိမ်မြှောင် မည်ကဲ့သို့ အသက်ရှင်နေခဲ့သည်ကို သူအရမ်း သိချင်နေမိသည်။
            
နံရံကို ဆက်မဖျက်တော့ဘဲ (၁၀)နှစ် အတွင်း အသက်ဆက် ရှင်နေသော အိမ်မြှောင်ကို သူစူးစမ်းခဲ့သည်။ သိပ်မကြာလိုက်ပါ။ အစာကိုက်ချီထားသော အိမ်မြှောင် နောက်တစ်ကောင်ကို သူ တွေ့လိုက်မိသည်။ သူခဏသာ မင်သက်သွားမိသည်။ (၁၀)နှစ်လုံးလုံး မပျက်မကွက် အစားကိုက်ချီ ကျွေး မွေးခဲ့သော နောက်အိမ်မြှောင်ဟာ ဒီအိမ်မြှောင်နဲ့ ဘာတော်သလဲ။ ဒါဟာ ဘယ်လို မေတ္တာမျိုးလဲ။ အဲဒီအိမ်မြှောင်ဟာ သူရဲ့ မိသားစုလား... သူငယ်ချင်းလား... မောင်နှမလား.... ဒါမှမဟုတ်.....
            
ဒီပုံပြင်ကို ဖတ်မိပြီး ရင်ထဲကို အမည်မသိ ဝေဒနာတခု တိုးဝင်လာခဲ့မိတယ်။ ဒီလောကကြီးဟာ အရာရာ တိုးတက်ပြောင်းလဲ လာသည်နှင့်အမျှ တစ်ဦးနဲ့တစ်ဦး ဆက်သွယ်ဖို့ကလဲ လွယ်ကူ မြန်ဆန်လာခဲ့တယ်။ ဒါပေမယ့် တစ်ဦးအပေါ်တစ်ဦးထားတဲ့ မေတ္တာနဲ့ နားလည်မှု စိတ်တွေကတော့ ဝေး.....ဝေး....ဝေး....လို့ ..။

အထက်ပါ အတိုင်း ဒီလို ရေးထားပါတယ်။ ကျွန်တော် တစ်ခုတော့ စဉ်းစားမိပါတယ်။ သတ္တဝါတွေမှာ အန္တရာယ်ကို ရင်ဆိုင်ဖို့အတွက် သူ့ဖာသာ သဘာဝကြီးက အလိုလို ဖြည့်ဆည်းပေးထားတတ်ပါတယ်။ ဥပမာ - မြင်းဆို အပြေးမြန်မယ်။ နွားတွေ ၊ ကျွဲတွေဆို ဦးချိုတွေပါမယ်။ တောဝက်တွေဆို အစွယ်ပါမယ်။ ဒီလိုပဲလေ။
                
သတ္တဝါတွေထဲမှာ အမြီးနဲ့ ခန္ဓာကိုယ် တစ်ရွယ်တည်းနီးပါ ရှိနေတဲ့ အထဲမှာ အိမ်မြှောင်ကလည်း တစ်ကောင်အပါအဝင်ပေါ့။ ဒါပေမဲ့ .. အိမ်မြှောင်မှာ ထူးဆန်းတာက သူရဲ့ သဘာဝကိုက သူ့ကို တိုက်ခိုက်လာတဲ့ ရန်သူကို မျက်စိမှားပြီး သူအထင်နဲ့ ကိုယ်လွတ်ရုံးလို့ရအောင် သူက သူ့အမြီးကို ဖြတ်ပြီး ပြေးလို့ရတယ်။ ဒီလို အမြီးဖြတ်တဲ့ အတွက် သူ့မှာ သေစရာအကြောင်းလည်း မရှိပါ။ သူ့ အမြီးကလည်း အသစ်ထွက်လာတာပါပဲ။
              
အခု ဒီစာလေးမှာ အိမ်မြှောင် အမြီးကို ၁၀ နှစ်လုံးလုံး အိမ်ရိုက်သံက စူးဝင်နေတယ် ဆိုတော့ ကျွန်တော် လည်း တကယ်ကို အံ့သြရပါတယ်။ ရန်သူနဲ့ တွေ့ရင်တောင်မှ အမြီးဖြတ်ထားပြီး ပြေးတတ်တဲ့ အိမ်မြှောင်က အခု အမြီးကြီးတစ်ခုလုံးကို သံအရိုက်ခံရတာကို ဘာလို့ သူ အမြီးဖြတ်မပြေးတာလဲ။ တကယ်လို့ ခန္ဓာကိုယ်ကို သံစူးဝင်နေတယ် ဆိုရင် ကျွန်တော် လက်ခံပါတယ်။
              
ဒီတော့ အမြီးကို သံစူးဝင်နေတာကို တခြားသတ္တဝါတွေထက် ထူးခြားသော သဘာဝလက်ဆောင်ရထားတဲ့ အိမ်မြှောင်က ဘာလို့ သူ့အမြီးကို ဖြတ်မပြေးတာလဲ။ သူက အပျင်းကြီးတဲ့ အိမ်မြောင်လား ၊ ဒါမှ မဟုတ် ယောက်ျားလုပ်စာ ထိုင်စားချင်တဲ့ အိမ်မြှောင်လား (သို့) မိန်းမလုပ်စာ ထိုင်စားချင်တဲ့ အိမ်မြှောင်လား။ ဒီလို လား...၊ လား...၊  လား...ပေါင်းများစွာနဲပဲ...ကျွန်တော် စဉ်းစားလို့ မကုန်တော့ပါဘူး။

နောက်တစ်ချက် ကတော့ တိုပြီးတော့ ပြတ်ပါတယ်။

အိမ်မြောင်ဆိုတာ ၁၀ နှစ် သက်တမ်း ရှိပါ့မလား။ စဉ်းစားပါဦး။
               
ကဲ. . သူငယ်ချင်းကရော . . တစ်ခုခုလေးပေါ့။ ဘယ်လို စဉ်းစားမိလဲ။

ကိုဇော် ခံစားပုံဖော်သည်။

http://zaw357.multiply.com/journal/item/791 မှာ 26.11.2009 က ရေးထားတာပါ။
.

နည်းနည်းတွေးပြီး စဉ်းစားပေးပါ..(၂)