21 ကျွန်တော့် ဘူတာရုံလေး

---

လူနှစ်ယောက် လွမ်းလွမ်းဆွေးဆွေး ခွဲခွာကာ ကွဲကွာသွားဖို့ အကောင်းဆုံး နေရာလေးက ဘယ်နေရာလေးများ ဖြစ်မလဲလို့ ကျွန်တော် ငယ်ငယ်က ပြင်းပြင်းရှရှ စဉ်းစားခဲ့မိဖူးတယ်။

လေယာဉ်ကွင်းများ ဖြစ်လေမလား ၊ အဝေးပြေးကား ဂိတ်များ ဖြစ်လေမလား ၊ သင်္ဘောဆိပ်များ ဖြစ်လေမလားလို့ ကျွန်တော် နေရာပေါင်းစုံကို အကြောင်းအရာ ပေါင်းစုံနဲ့ စဉ်းစားမိဖူးတယ်။ ဒါနဲ့ . . . နောက်ဆုံးတော့ “ ဘူတာရုံလေး ” ကို ကျွန်တော် သွားသတိထားမိတယ်။ 

လူနှစ်ယောက် သူတို့ အတူတူ ဘူတာရုံလေးကို ရောက်လာတယ်။ တစ်ယောက်က ရထားကြီးကို စီးပြီး လိုက်သွားရမယ် ၊ တစ်ယောက်ကတော့ ရထားကြီး စီးသွားမဲ့ သူကို လိုက်ပို့ရုံမျှသာ ၊ ပြီးရင် သူက ပြန်ရမယ်။ သူတို့ နှစ်ယောက် အတူတူ လက်တွဲပြီး ဘူတာရုံလေးထဲကို ဝင်လာမယ် ၊ နောက်တော့ ဘူတာရုံလေးမှာ ရှိနေတဲ့ စင်္ကြန်လမ်းမပေါ်မှာ သူတို့ တစ်ယောက်ကို တစ်ယောက် ကြည့်ပြီး မျက်နှာချင်းဆိုင် စကားပြောကြမယ်။ 

နောက်တော့ “ ရထားထွက်ရန် ငါးမိနစ်သာ လိုတော့သည်။ ” ဆိုတဲ့ စာတန်းကြီးက ဘူတာရုံလေးမှာ ပေါ်လာတဲ့ အခါမှာ ရထားကြီးနဲ့ လိုက်ပါသွားမဲ့ သူက ဘူတာရုံလေးမှာ ကျန်နေခဲ့မဲ့ သူကို နှုတ်ဆက်ပြီး ရထားပေါ် တတ်သွားမယ် ၊ ဒါပေမဲ့ ရထားက မထွက်သေးတော့ ရထားပေါ်က လူနဲ့ ရထားအောက်က လူတို့ ရထား ပြတင်းပေါက်ကနေပြီး ခေါင်းထွက်ကာ စကားပြောကြမယ်။ မပါမဖြစ် စကား ဖြစ်တဲ့ “ နေကောင်းအောင် နေနော် ” ဆိုတဲ့ စကား ပါကိုပါလိမ့်မယ်။ အချိန်မှာပဲ.. . . . .

“ ပေါ် . . . ပူ. . . . ပီး. . . . ပေါ်. . . . ”

ဆိုပြီး ရထားကြီးက ထွက်ခွာဖို့ ဥသြ ဆွဲလိုက်တဲ့ အခါမှာ ရထားပေါ်က လူကလည်း ရထားအောက်က လူကို “ ဘာမှ မပူဖို့ ” မှာဦးမယ်။ ၊ ရထားအောက်က လူကလည်း ရထားပေါ်က လူကို “ အရာရာ ဂရုစိုက်ဖို့ ” မှာဦးမယ်။ ရထားက ထွက်ဖို့ ဘီးစလှိမ့်နေတော့ ရထားပေါ်က လူကလည်း ခေါင်းကို အထဲ သွင်းလိုက်ရမယ် ၊ ဒီလိုပဲ ရထားအောက်က လူကလည်း ရထားရဲ့ လေရှိန်လွတ်အောင် နောက်ကို နည်းနည်း ဆုတ်လိုက်ရမယ်၊။

ဒီလို လူနှစ်ယောက် အနည်းငယ်လှမ်း သွားတော့ သူတို့ လှမ်းပြီး စကားမပြော ဖြစ်ကြတော့ဘုး။ စကားမပြော ဖြစ်တာလား ၊ ပြောဖို့ နှုတ်တွေ ဆွံအသွားတာလား ဆိုတာလည်း သူတို့ဖာသာ သေချာ မသိကြဘူး။ နောက်တော့ သူတို့ လက်ကို ဝှေ့ယမ်းပြီး နှုတ်ဆက်မယ် ၊ မျက်နှာချင်းဆိုင်ကနေ ဝှေ့ယမ်း နှုတ်ဆက်နေတဲ့ လက်တွေက ရထားကြီး စတင် ဘီးရွေ့နေပြီ ဖြစ်လို့ တစ်ခုခုက ဆွဲလှည့်လိုက်သလို သူတို့ ခန္ဓာကိုယ်တွေကလည်း ရထားပေါ်က လူနဲ့ တန်းနေအောင် မျက်နှာလိုက်မူ နေကြမယ် ၊ နောက်တော့ မြင်နိုင်သမျှ မြင်နိုင်တဲ့ အချိန်အထိ သူတို့ လက်တွေ ဝှေ့ယမ်း ပြနေကြမယ်။ 

အို . . မဟုတ်ဘူး။

သူတို့ မမြင်နိုင်တော့ပါဘူး ဆိုတာကို သိနေတဲ့ အချိန်ထိအောင်ကို လက်တွေ ဝှေ့ယမ်း ပြနေကြမယ်။ နောက်ဆုံးမှာတော့ ရထားကြီးက ရထားပေါ်က လူကို သယ်ဆောင်သွားပြီး တဖြေးဖြေးနဲ့ ဝေးသွားမယ် ၊ ရထားအောက်က ကျန်နေတဲ့ လူကလည်း ဘူတာရုံလေးမှာ လက်ဝှေ့ယမ်းပြရင်း ဝေးကာ ဝေးကာ ကျန်နေခဲ့မယ်။ ဒါပေမဲ့ ရထားပေါ်က လူရဲ့ စိတ်အနားမှာ ရထားအောက်က လူက ပါသွားပြီး ၊ ရထားအောက်က လူရဲ့ စိတ်အနားမှာ ရထားပေါ်က လူက ကျန်ခဲ့မယ်။ သူတို့ စိတ်ထဲမှာတော့ သူတို့ တစ်ယောက် ဘေးနားမှာ တစ်ယောက်  ရှိနေကြတယ်။ 

ဝေးကာ ဝေးကာ သွားတဲ့ ရထားကြီးနဲ့ အတူ ဘူတာရုံက လူကလည်း ငေးကာ ငေးကာ ကျန်နေခဲ့မယ်။ ရထားပေါ်မှာ ပါသွားသူကလည်း ဆွေးကာ ဆွေးကာ ပါသွားနိုင်တယ်။ သူတို့ နှစ်ယောက် အတူတူ ဘူတာရုံလေးကို လာတယ်။ တစ်ယောက်က ရထားကြီးပေါ် တတ်ပြီး ၊ တစ်ယောက်က ဘူတာရုံလေးမှာ ကျန်နေခဲ့တယ်။ သူတို့ အတူတူ လာခဲ့တဲ့ ဘူတာရုံလေးကို သူတို့ ဘယ်တော့များမှ အတူတူ ပြန်လည် ဆုံစည်း တွေ့ဆုံနိုင်မလဲ။ 

ရထားအောက် ဘူတာရုံလေးမှာ ကျန်နေခဲ့သူကလည်း တစ်နေ့နေ့ တစ်ချိန်ချိန်မှာ အကြောင်း ကိစ္စ ရှိလို့ ဒီဘူတာရုံလေးကိုပဲ ရောက်လာနိုင်တယ် ၊ ဒါပေမဲ့ ရထားပေါ်ကို ပါသွားသူနဲ့ ပြန်ဆုံနိုင်ချင်မှ ပြန်ဆုံရလိမ့်မယ်။ ရထားပေါ်မှာ ပါသွားသူကလည်း တစ်နေ့နေ့ တစ်ချိန်ချိန်မှာ ကိစ္စရှိလို့ ဒီဘူတာရုံလေးကို ရောက်လာနိုင်တယ် ၊ ဒါပေမဲ့ ရထားအောက် ဘူတာရုံမှာ ကျန်နေခဲ့သူနဲ့ ပြန်ဆုံနိုင်ချင်မှာ ဆုံနိုင်တော့မယ်။ ဒီလိုပဲ သူတို့ နှစ်ယောက်စလုံးလည်း ဒီဘဝမှာ ပြန်ဆုံဖြစ်ချင်မှ ဆုံဖြစ်တော့မယ်။ ဆုံချိန်တန်တော့လည်း သူတို့နှစ်ယောက် ဘူတာရုံလေးမှာ ပျော်ရွှင်စွာ ဆုံစည်းနိုင်ကြမယ်။

ဒီလို စဉ်းစားပြီးတဲ့ နောက်မှာ ကျွန်တော် အလုပ်အားနေပြီး တစ်ခုခုကို တသသ လွမ်းသလို ဖြစ်နေခဲ့ရင် ရထားဘူတာရုံ တစ်ခုရဲ့ တိတ်တဆိတ် ထောင့်ထိုင်ခုံလေး တစ်ခုမှာ ရင်တထိတ်ထိတ်နဲ့ ကျွန်တော် သွားထိုင်နေလေ့ ရှိပါတယ်။ များပြားလှတဲ့ ရထားစီးလူတွေကို ကျွန်တော် တစ်ယောက်တည်း ငြိမ်ပြီး တွေငေးငေး ကြည့်နေမိတယ်။

လူနှစ်ယောက် လာပြီး တစ်ယောက်က ရထားပေါ်မှာ ပါသွားပြီး တစ်ယောက်က ဘူတာရုံလေးမှာ ကျန်နေခဲ့တာမျိုး မြင်တွေ့ခဲ့ရဖူးသလို ၊ ဘယ်က ဘယ်အချိန် ပြန်လာမယ်မှန်း မသိတာကို ကြောင်တောင်တောင်နဲ့ တစ်နေနေရာကို မျှော်ငေးစောင့်စား နေတတ်သူတွေကိုလည်း တွေ့ခဲ့ရဖူးသလို ၊ ရထားပေါ်ကနေ ဘူတာရုံလေးကို ဆင်းတော့ ဘယ်သူများ လာကြိုနေလိမ့်မလဲ ဆိုပြီး ယောင်တောင်တောင် မျက်ဝန်းများနဲ့ လူရှာနေတတ်တဲ့ လူမျိုးတွေကိုလည်း တွေ့ခဲ့ရဖူးသလို ၊ ရထားပေါ်က ဆင်းတော့ ဘူတာရုံလေးမှာ မျှော်လင့် စောင့်ဆိုင်းနေတဲ့ သူကို တွေ့လို့ သူတို့ ပျော်ရွှင်စွာ ပြန်သွားတာကိုလည်း မြင်တွေ့ခဲ့ရဖူးပါတယ်။

အချိန်အားတိုင်း စိတ်ပြေလက်ပျောက်  ဘူတာရုံလေးမှာ တိတ်တဆိတ် သွားငေးနေရင်း ကြာလာတော့ ကျွန်တော် စိတ်ကူးလေး တစ်ခု ထပ်ရခဲ့ပါတယ်။ ကျွန်တော်တို့ ကျောင်းတွေရဲ့ ကော်ရစ်တာ ထောင့်ချိုးတွေမှာ Notice Board လိုမျိုး ရထား ဘူတာရုံတွေမှာ ထားဖို့ ကျွန်တော့်မှာသာ အခွင့်အာဏာ ရှိနေခဲ့ရင် ကျွန်တော် ထားပေးမိမှာ အမှန်ပါပဲ။

ဒါမှ ကွဲကွာသွားကြတဲ့ လူနှစ်ယောက် တစ်နေ့သော အခါမှာ တစ်ယောက်က ဒီဘူတာရုံလေးကို ပြန်လည် ရောက်ခဲ့တယ် ဆိုရင် သူရောက်ခဲ့တယ် ဆိုတာကို Notice Board မှာ စာရွက်လေးနဲ့ ရေးပြီး ကပ်ထားခဲ့လိုက်။ သူနဲ့ သက်ဆိုင်တဲ့သူက ဘူတာရုံလေးကို ရောက်တယ် ဆိုရင် သက်ဆိုင်သူရဲ့ စာလေးကို ဖတ်ပြီး သူကလည်း ရောက်ခဲ့တယ် ဆိုတာကို စာလေးရေးထားခဲ့လိုက်ရင် သူတို့ တိုက်ရိုက် ဆုံစည်းခွင့် မရတာတောင်မှ တဆင့်ခံအနေနဲ့ ဆုံစည်းခွင့် ရကြလိမ့်မယ် လို့ ကျွန်တော် စိတ်ကူးရခဲ့မိပါတယ်။

~ ~ ~ ~ ~ ~ ~ ~ @ @ @ ~ ~ ~ ~ ~ ~ ~ ~ ~ ~ 

“ ပေါ် . . .  ပူ . . . . .ပီ. . . . .ပေါ်. . .  . ”

ဟော . . .  ရထား ဥသြသံပါလား။

ဟင် . . . 

ကျွန်တော်က ရထားကြီး တစ်စီးပေါ်မှာ ရောက်နေတာပါလား။

ဟုတ်ပါတယ်။ ကျွန်တော် အခု ရထား တစ်စီးပေါ်ကို ရောက်နေခဲ့ပါတယ်။ အလုပ်နှင့် သက်ဆိုင်သော ကိုယ်ရေးကိုယ်တာ ကိစ္စကြောင့် ကျွန်တော် အရင်လို စာဆက်ပြီး မရေးဖြစ်တော့ပါဘူး။ ဒီခရီးကလည်း ဘယ်လောက်ကြာမယ် ဆိုတာ  ၊ ပြီးတော့ ဘယ်လောက် ဝေးမယ် ဆိုတာ မသိတဲ့ အတွက် ကျွန်တော် အရင်လို စာဆက်ပြီး မရေးနိုင်တော့မှာ မဟုတ်ပါဘူး။

သို့သော်. . .

တကယ်လို့ ကျွန်တော် ဒီနေရာလေးကို ရောက်ခဲ့တယ် ဆိုရင်. . . . . ၊ ပြီးတော့. .  www.zaw357.net ဆိုတာ ဘူတာရုံလေး ဖြစ်တယ် ဆိုပါစို့။ ကျွန်တော် ရောက်ခဲ့တယ် ဆိုတာကို သိရဖို့ ကျွန်တော့်အတွက် Notice Board လို့ ဆိုရမဲ့ ပို့စ်နေရာမှာ ကျွန်တော် ပို့စ်တင်သွားပါ့မယ်။ ဒီတင်ဖြစ်မဲ့ ပို့စ်ဟာ ဘယ်လောက်ကြာမှ တင်ဖြစ်မယ် ဆိုတာတော့ ကျွန်တော်ကိုယ်တိုင်လည်း မပြောနိုင်ပါဘူး။ တင်ဖြစ်တဲ့ အခါကျရင်တော့ အချိန်ရသလောက် တင်ပေးသွားပါ့မယ်။ ဒီထက် အချိန်ရခဲ့ရင် ကျွန်တော် Cbox မှာ အားလုံးကို နှုတ်ဆက် စကားပြောပါ့မယ်။

အခုတော့ တစ်နှစ်ခွဲတာ ကာလမျှ ကျွန်တော် ရေးသမျှ ၊ တင်သမျှ ကောင်း၏ ၊ ဆိုး၏ မှန်သမျှကို မငြီးမငြူ အားပေးတဲ့ စာဖတ်သူများ အားလုံးကို နှုတ်ဆက် ခဲ့ပါတယ်။ 

ထပ်ကာ. . . . ကျွန်တော် နှုတ်ဆက်နေကြ အတိုင်းလေး နှုတ်ဆက်ပါ့မယ်။

• ကျွန်တော့်ကို ချစ်သော . . . .

•  ကျွန်တော့်ကို မုန်းသော . . . .

• ကျွန်တော့်ကို ဘယ်လိုမှ မနေသော . . . .

စာဖတ်သူများ အားလုံး ပျော်ရွှင်ပါစေသား။

လေးစားစွာဖြင့်

ကိုဇော်

.

ကျွန်တော့် ဘူတာရုံလေး